Aksident në autostradën Fier–Lushnjë, plagosen dy persona pranë rrethrrotullimit të Kolonjës
Një aksident rrugor është regjistruar paraditen e kësaj të mërkure në autostradën Fier–Lushnjë, në zonën e rrethrrotullimit të Kolonjës, në kahun e lëvizjes drejt Lushnjës.
Sipas informacioneve paraprake, një automjet tip fuoristradë është përplasur me forcë nga pas me një kamionçinë. Si pasojë e goditjes, dy personat që udhëtonin në fuoristradë kanë mbetur të plagosur dhe janë transportuar me ambulancë drejt Spitalit të Lushnjës për të marrë ndihmën e nevojshme mjekësore.
Burime nga spitali bëjnë me dije se të lënduarit ndodhen nën kujdesin e mjekëve dhe fatmirësisht janë jashtë rrezikut për jetën.
Në vendngjarje kanë mbërritur menjëherë shërbimet e Policisë Rrugore, të cilat po kryejnë veprimet procedurale për dokumentimin e aksidentit dhe zbardhjen e plotë të rrethanave të ngjarjes.
Nga të dhënat e para, dyshohet se shkak i aksidentit ka qenë shpejtësia e lartë e fuoristradës, e cila në hyrje të rrethrrotullimit nuk ka arritur të frenojë në kohë, duke u përplasur me kamionçinën që lëvizte përpara saj.
Hetimet për rastin vijojnë.
