Lushnjë/ Përfshihet nga flakët furgoni me targa të Maqedonisë së Veriut, ngordhin mbi gjysma e zogjve
Një furgon me targa të Maqedonisë së Veriut është përfshirë nga flakët mëngjesin e kësaj të shtune, në afërsi të zonës së “Pushimit të Shoferit” në Lushnjë.
Mjeti, i cili transportonte zogj të vegjël të fushës nga shteti fqinj, ka marrë flakë pasi drejtuesi kishte dalë nga autostrada dhe po lëvizte në drejtim të Këmishtajt.
Menjëherë pas konstatimit të zjarrit, në vendngjarje kanë mbërritur shërbimet zjarrfikëse të Lushnjës. Zjarrfikësit kanë ndërhyrë për shuarjen e flakëve, të cilat ishin përqendruar kryesisht në pjesën e kabinës së drejtuesit.
Si pasojë e zjarrit, janë shkaktuar dëme të konsiderueshme në ngarkesën e furgonit. Mbi gjysma e zogjve që transportoheshin kanë ngordhur, për shkak të flakëve dhe tymit.
Nga të dhënat paraprake të shërbimit zjarrfikës, dyshohet se zjarri është shkaktuar nga një defekt në sistemin e kondicionimit të pjesës së ngarkesës.
Fatmirësisht, nga ngjarja nuk raportohet për persona të lënduar. Autoritetet kanë nisur veprimet për dokumentimin e plotë të ngjarjes dhe përcaktimin e shkaqeve të zjarrit.
