Mallakastër/ Ndezi zjarrin për të djegur mbeturinat, flakët përhapen në tokat me ullinj dhe djegin çatinë e një banese, arrestohet 33-vjeçari
Një 33-vjeçar është arrestuar në flagrancë nga Policia e Mallakastrës, pasi dyshohet se ndezi zjarr për djegien e mbeturinave në tokën e tij, por flakët, të favorizuara nga era e fortë, u përhapën në sipërfaqe të tjera përreth.
Në pranga ka rënë shtetasi Dionis Kalemaj, 33 vjeç, banues në Ballsh, i dyshuar për veprën penale “Shkatërrimi i pronës me zjarr”.
Ngjarja ka ndodhur ditën e djeshme në fshatin Mollaj, ku zjarri u përhap me shpejtësi duke shkaktuar dëme në tokat e mbjella me ullinj. Si pasojë e flakëve është djegur edhe çatia e një banese.
Pas marrjes së njoftimit, në vendngjarje shkuan shërbimet e Komisariatit të Policisë Mallakastër dhe ato të shërbimit zjarrfikës, të cilat ndërhynë për izolimin dhe shuarjen e vatrave të zjarrit. Fatmirësisht, nga ngjarja nuk pati pasoja për jetën e njerëzve.
Sipas hetimeve paraprake, 33-vjeçari dyshohet se kishte ndezur zjarr për të djegur mbeturina në tokën e tij, ndërsa era e fortë favorizoi përhapjen e flakëve në sipërfaqet përreth.
Policia e Fierit apelon qytetarët të tregojnë kujdes maksimal dhe të shmangin ndezjen e zjarreve për djegien e mbetjeve bujqësore apo pastrimin e tokave, pasi një veprim i tillë mund të çojë në përhapje të pakontrolluar të flakëve dhe në dëmtime të pronës, mjedisit apo rrezikimin e jetës së njerëzve.
