Qeparo/ ndërtimi i paligjshëm i objektit 5-katësh, Skënder Hita pezullon nga detyra zinxhirin komandues të komisariatit të himarës
Drejtori i Përgjithshëm i Policisë së Shtetit, Drejtues Madhor Skënder Hita, ka urdhëruar pezullimin e menjëhershëm nga detyra të katër punonjësve të Policisë së Shtetit, pjesë e strukturave drejtuese dhe hetimore të Komisariatit të Policisë Himarë.
Vendimi është marrë pas konstatimit të një ndërtimi pa leje në vendin e quajtur “Sugë”, në Qeparo, Himarë, ku ishte ndërtuar një objekt me një kat nëntokë dhe katër kate mbi tokë.
Sipas Policisë, ndërtimi kishte nisur në dhjetor 2025, ndërsa nga ana e strukturave të Komisariatit të Policisë Himarë nuk ishin marrë masat e nevojshme për parandalimin e tij dhe vendosjen përpara përgjegjësisë ligjore të autorit.
Nga detyra janë pezulluar:
- Nënkomisar Ferit Merkaj, ish-Shef i Komisariatit të Policisë Himarë, aktualisht Shef i Seksionit për Trafiqet e Paligjshme në DVP Vlorë;
- Komisar Emiljano Prenga, ish-Shef i Seksionit dhe Specialist në Seksionin për Hetimin e Krimeve në Volum në Komisariatin e Policisë Himarë, aktualisht me të njëjtën detyrë në Komisariatin e Policisë Divjakë;
- Nënkomisar Klodjan Petani, ish-Specialist për Hetimin e Krimit në Zonën Policore nr. 1, aktualisht Specialist për Hetimin e Krimit në Komisariatin e Policisë Vlorë;
- Inspektor Redin Çaushaj, me detyrë Ndihmës/Specialist SPZ në Zonën Policore nr. 1 të Komisariatit të Policisë Himarë, ku u konstatua ndërtimi pa leje.
Ndaj tyre ka nisur edhe hetimi disiplinor për moskryerjen e detyrave funksionale.
Ndërkohë, për ndërtimin pa leje është arrestuar shtetasi L. B., banues në Laç, ndërsa janë shpallur në kërkim tre punonjës të IMT-së Himarë, konkretisht kryeinspektori dhe dy inspektorë, të dyshuar për veprën penale “Shpërdorimi i detyrës”.
Policia e Shtetit deklaron se do të vijojë me masa të rrepta ndaj çdo punonjësi që nuk zbaton ligjin, nuk përmbush detyrën apo abuzon me funksionin.
