Rrezik serioz në Fier: Kabull tre-fazor i elektrikut kalon mes përmes pemëve pranë Drejtorisë së Automjeteve
Një qytetar i është drejtuar redaksisë së Fieri Web për të denoncuar një situatë shqetësuese dhe potencialisht të rrezikshme në qytetin e Fierit.
Sipas denoncimit, në rrugën “Teodor II Muzaka”, në lidhje me lagjen Sheq i Madh, pranë Drejtorisë së Patentave, prej disa vitesh është kaluar një kabull elektrik tre-fazësh direkt nëpër pemët e rrugës.
Qytetari shprehet se kjo ndërhyrje e bërë nga punonjësit e elektrikut përbën një rrezik serioz për banorët dhe kalimtarët, pasi nga erërat e forta kabulli mund të këputet dhe të shkaktojë pasoja fatale.
Në videon e dërguar në redaksinë tonë, duket qartë se teli kalon mes për mes pemës, pa asnjë masë sigurie, duke rritur rrezikun sidomos në kushte moti të keq.
🗣️ “Ju lutem postojeni që ta shikojnë shefat e elektrikut në Fier” – shprehet qytetari në mesazhin e tij.
📢 Fieri Web i bën thirrje institucioneve përgjegjëse dhe OSHEE Fier të reagojnë sa më parë, përpara se kjo situatë të kthehet në një ngjarje të rëndë.
👉 Qytetarët që hasin probleme apo rreziqe të ngjashme, mund të na dërgojnë mesazhe, foto dhe video në faqen Fieri Web.
