ZBULOHET IDENTITETI/ Nuredin Dumani qëndroi dy muaj në Elbasan, objektivi që do ekzekutonte ndodhet në burg, i dënuar për vrasje
Prej dy muajsh qëndronte në Elbasan duke u përgatitur për misionin e tij, teksa 30 Marsi e nxori nga “strofulla” dhe u nis për të ekzekutuar objektivin e tij, por u bë vetë “pre” e një atentati, duke u plagosur, teksa më pas përfundoi i arrestuar nga policia në Fier, në banesën që kishte marrë me qira.
Fillimisht u mendua se objektivi i Dumanit ishte Talo Çela, një nga personat më të kërkuar në Shqipëri dhe armiku i betuar i tij. Por burime për Abc thonë se objektivi i Dumanit ishte dikush tjetër, një emër mjaft i njohur për drejtësinë, Sokol Sanxhaktari. Sipas këtyre burimeve, Dumani ishte kontaktuar nga një grup kriminal për të ekzekutuar Sanxhaktarin.
Ajo që mbetet ende enigmë është mënyra sesi Dumani do ta ekzekutonte Sokol Sanxhaktarin, pais ky i fundit ndodhet në burg, i dënuar me 18 vite heqje lirie për vrasjen e Florian Lamçes në Elbasan në 30 korrik të vitit 2020. Nuk dihet se cilën nga hallkat e sistemit të drejtësisë, policisë apo burgjeve do të shfrytëzonte ai për të përmbushur misionin e tij.
Dumani është marrë në pyetje edhe nga oficerët e Byrosë Kombëtare të Hetimit në lidhje me porositësit e vrasjes dhe objektivin, por edhe për ngjarje të tjera që lidhen me emrin e tij. Duket e vështirë që Nuredin Dumani të flasë, por nëse drejtësia arrin ta kthejë në “pendito”, atëherë do të ishte një aset i çmuar që do të zbardhte shumë ngjarje kriminale në Shqipëri, të lidhura me të.