Humb kontrollin e automjetit dhe përplaset me barrierat në bypass-in e Fierit, një person përfundon në spital
Një aksident rrugor ka ndodhur mesditën e sotme në bypass-in e Fierit, në segmentin e autostradës Fier–Levan.
Sipas të dhënave paraprake, një automjet tip Volkswagen ka humbur kontrollin dhe është përplasur me barrierat mbrojtëse të rrugës. Në mjet udhëtonin pesë persona, ndërsa njëri prej tyre ka mbetur i lënduar lehtë dhe është transportuar me ambulancë në Spitalin Rajonal të Fierit për të marrë ndihmën mjekësore.
Menjëherë pas aksidentit, në vendngjarje kanë mbërritur shërbimet e Policisë, të cilat kanë nisur hetimet për të përcaktuar shkaqet dhe rrethanat e ngjarjes. Po ashtu, uniformat blu po menaxhojnë qarkullimin në këtë aks, ku gjatë këtyre ditëve regjistrohet fluks i lartë automjetesh për shkak të lëvizjes së pushuesve drejt jugut të vendit.
Fatmirësisht, aksidenti nuk ka shkaktuar pasoja të rënda, ndërsa hetimet vijojnë.
