Automjeti përfshihet nga flakët në kryqëzimin e Zogut të Zi në Fier, zjarri neutralizohet në kohë
Një automjet është përfshirë nga flakët pasditen e kësaj të premteje në kryqëzimin e Zogut të Zi, në Fier, duke shkaktuar panik te drejtuesit e mjeteve dhe kalimtarët.
Falë ndërhyrjes së shpejtë të shërbimit zjarrfikës, flakët u neutralizuan në kohë, duke mos lejuar përhapjen e zjarrit në të gjithë automjetin. Si pasojë, dëmet u kufizuan kryesisht në pjesën e motorrit.
Sipas informacionit paraprak të Policisë, sot, më 7 gusht 2026, shtetasi me inicialet I. K. ka njoftuar se automjeti që përdorte, në pronësi të shtetasit L. A., ishte përfshirë nga flakët.
Nga veprimet e para hetimore dyshohet se zjarri mund të jetë shkaktuar si pasojë e një defekti në impiantin e gazit të automjetit.
Grupi hetimor po vijon veprimet procedurale për të përcaktuar me saktësi shkakun e rënies së zjarrit, ndërsa fatmirësisht nuk raportohet për persona të lënduar.
