Elbasan/ Konfirmohet viktima e dytë nga shpërthimi në pallat, gjendet trupi i 69-vjeçarit nën rrënoja
Është konfirmuar viktima e dytë nga shpërthimi i fuqishëm që tronditi mesditën e së mërkurës një pallat 5-katësh në lagjen “Beqir Dardha” në Elbasan.
Trupi i pajetë i 69-vjeçarit Hamit Ibro është gjetur nën rrënojat e godinës nga ekipet e kërkim-shpëtimit të Forcave të Armatosura. Ai rezultonte i zhdukur që prej momentit të shpërthimit, ndërsa kërkimet për gjetjen e tij vijuan për orë të tëra.
Nga shpërthimi, i cili ndodhi në një apartament të pallatit, u shkaktuan dëme të rënda strukturore. Muret e apartamentit dhe shkallët e godinës u shembën, ndërsa tre kate të ndërtesës pësuan dëmtime të rënda.
Më herët, nga kjo ngjarje humbi jetën edhe një 82-vjeçare, e cila banonte në apartamentin ngjitur me atë ku ndodhi shpërthimi.
Ndërkohë, 10 persona të tjerë pësuan asfiksi dhe morën ndihmë mjekësore në spital. Fatmirësisht, ata ndodhen jashtë rrezikut për jetën.
Pallati është shpallur i pabanueshëm, ndërsa banorët janë evakuuar. Autoritetet po marrin masa për sistemimin e tyre.
Shkaqet e shpërthimit mbeten ende të paqarta. Dyshimet paraprake janë për shpërthimin e një bombole gazi.
